Монгол Улсын төлбөрийн тэнцэл гурав дахь сардаа дараалан ашигтай гарлаа. Есдүгээр сарын эцэст төлбөрийн тэнцлийн дүн 49 сая ам.долларын ашигтай гарснаар энэ оны эхний есөн сард 53.2 сая ам.доллар хүрч байна.

Наймдугаар болон есдүгээр сард барааны экспорт сайжирч, оны эхний долоон сарын турш алдагдалтай байсан урсгал данс ашигтай гарч эхэлсэн юм. Ялангуяа есдүгээр  сард барааны экспорт 1.6 тэрбум ам.доллар хүрч, нэг сарын дүнгээр түүхэн дээд түвшинд хүрэхэд оны хоёрдугаар хагасаас эрчимжсэн эрдэс бүтээгдэхүүний экспорт гол түлхэц болжээ. 

Оны эхний 10 сард нүүрсний экспортын биет хэмжээ 65 сая тонн хүрсэн бөгөөд тэр дундаа зөвхөн хоёрдугаар хагаст 30 сая тонныг экспортлоод буй. Хэдий үнийн дүнгийн хувьд өмнөх оныхоос гурван тэрбум ам.доллароор бага байгаа ч нөгөө талд зэсийн баяжмалын экспортын хэмжээ 1.9 сая тонн болж, үнийн дүнгээр 4.5 тэрбум ам.доллар хүрсэн нь том дэм болсон байна.

Түүхэн чиг хандлагаас харвал III улирлын сүүлийн сард үйлчилгээний алдагдал тэр дундаа боловсролтой холбоотой аяллын үйлчилгээний алдагдал өмнөх саруудаасаа нэмэгдэж, урсгал дансанд дарамт болдог. Гадагш чиглэсэн боловсролын төлбөрөөс үүдэлтэй алдагдал өнгөрсөн есдүгээр сард 176 сая ам.доллар хүрсэн нь урсгал дансны үзүүлэлтийг тодорхой хэмжээгээр доош татжээ. Гэхдээ өмнөх оны мөн үетэй харьцуулахад урсгал дансны алдагдал 7.6 хувиар буурч, 1.6 тэрбум ам.доллартой тэнцэж байна.

Харин санхүүгийн дансны ашиг хоёр тэрбум ам.доллартой тэнцэж, өмнөх оны эхний есөн сараас 78 хувиар өссөнийг онцолж болохоор байгаа юм.