(Bloomberg) -- ОХУ-ын газрын тосны магнат “Rosneft” болон “Lukoil” компаниуд АНУ-ын “Хар жагсаалт”-д орсноор БНЭУ-ын ОХУ-аас авах газрын тосны урсгал бараг тэглэгдэхээр байгааг Энэтхэгийн газрын тосны салбарын албан тушаалтан “Bloomberg”-т мэдээлжээ.

Украины дайн эхэлснээс хойш ОХУ-ын хямд газрын тосны томоохон худалдан авагч болоод буй БНЭУ энэ он гарсаар түүхий газрын тосны хэрэгцээнийхээ 36 хувийг ОХУ-ын импортоор хангасан байна. Иймд тус улсын боловсруулах үйлдвэрүүд импортын өөр эх үүсвэр яаралтай хайх шаардлагатай болох төлөвтэй байгаа аж.

АНУ-ын Ерөнхийлөгч Дональд Трамп хориг арга хэмжээгээ ийнхүү өргөтгөсөн нь БНХАУ-ын газрын тосны зах зээлийг мөн доргиолоо. Газрын тосныхоо 20 хувийг ОХУ-аас авдаг тус улсын Төрийн болон хувийн өмчийн боловсруулах үйлдвэрүүд дам хоригт өртөх, өөрөөр хэлбэл барууны төлбөр тооцооны систем, тээвэрлэлт, даатгалын сүлжээг ашиглах боломжгүй болох дарамтад орж байна.

АНУ-ын шинэ хоригийн дагуу компаниуд ирэх 11 дүгээр сарын 21-нээс өмнө “Rosneft”, “Lukoil”-той байгуулсан худалдааны гэрээгээ цуцлах ёстой бол Засгийн газрын түвшинд байгуулсан гэрээг хэрхэх нь тодорхойгүй байна.