БНХАУ-ын автомашин үйлдвэрлэгч “Chery” компани пүрэв гарагт Хонконгийн биржид хувьцааныхаа анхдагч арилжааг эхлүүлж, 9.1 тэрбум хонконг доллар буюу 1.2 тэрбум ам.доллар татан төвлөрүүллээ. Нэгж хувьцааны ханш нь арилжааны эхний өдөр 14 хүртэлх хувиар өссөнөөр зах зээлийн үнэлгээ нь 25 тэрбум ам.доллар хүрч, нутаг нэгт өрсөлдөгч “Geely”-ийг дээрх үзүүлэлтээр ардаа орхижээ.

Автомашины экспортоор 2003 оноос хойш улсдаа тасралтгүй тэргүүлсэн “Chery” IPO-оор татан төвлөрүүлсэн хөрөнгөө гадаад зах зээл дэх тэлэлт, судалгаа хөгжүүлэлтийн ажилдаа зарцуулах аж.

Өнгөрсөн онд тус компани нийт үйлдвэрлэсэн автомашиныхаа 40 хувийг буюу 1.14 сая автомашиныг гадаадад экспортолсон байна. Тус компани мөн БНХАУ дахь үйлдвэрүүддээ “Jaguar”, “Land Rover” брэндийн автомашиныг угсардаг юм.

Хонконгийн Хөрөнгийн биржид хувьцааны анхдагч арилжаа эрс сэргэсэн үеийг ашиглаж буй БНХАУ-ын ээлжит компани нь “Сhery” болж байна. Тус зах зээлд энэ онд IPO-оор татан төвлөрүүлсэн нийт дүн дөрвөн жилийн дээд түвшинд хүрээд буй бөгөөд оны эцэс гэхэд 26 тэрбум ам.доллар хүрнэ гэж “Bloomberg Intelligence” тооцоолжээ.