Эрдэмтэд Монголын нутгаас бөмбөгөр оройтой цул гавлын ясаараа ялгардаг пахицефалозавр хэмээх үлэг гүрвэлийн чулуужсан ясыг олж илрүүлсэн болохыг Nature сэтгүүлд нийтлэгдсэн судалгаанд мэдээлжээ.

Бүтнээрээ олдсон тус араг яс нь 108-115 сая жилийн өмнөх үед хамаарч буй тул энэ төрлийн үлэг гүрвэлийн хамгийн эртний олдворт тооцогдож байна. Мөн пахицефалозаврын өмнө нь шинжлэх ухаанд танигдаагүй төрөл зүйл тул эрдэмтэд "Zavacephale rinpoche" хэмээн шинээр нэрлээд байгаа аж.

Олдворыг Монголын Шинжлэх ухааны академийн палеонтологич Ц.Чинзоригоор удирдуулсан баг Дундговь аймгийн Баянжаргалан сумын нутагт орших Хүрэн дух хэмээх газраас олсон байна.

Цэрдийн галавын үед Ази, Хойд Америкт амьдарч байсан, хоёр хөлтэй, өвсөн тэжээлтэй пахицефалозавр үлэг гүрвэлийн талаар өнөө цагт маш бага судлагдсан бөгөөд "хамгийн нууцлаг" үлэг гүрвэлүүдийн нэг болохыг судалгаанд онцолжээ. Өмнө нь энэхүү үлэг гүрвэлийн өвөрмөц бөмбөгөр хэлбэртэй гавлын ясны олдворууд л дангаараа олдож байсан аж.