(Bloomberg) -- "Huawei"-ийн хөгжүүлсэн “SuperPoD” хэмээх технологи нь тус компанийн “Ascend” брэндийн хиймэл оюунт чип бүхий 15,488 хүртэлх тооны график картыг холбож ажиллах чадалтайг мэдэгдэлдээ онцолсон байна. Энгийнээр хэлбэл олон тооны хиймэл оюунт чипийг багцалж, кластер үүсгэх замаар тооцоолон бодох хүчин чадлыг өсгөх технологи аж.

Энэ оны эхээр "Huawei" компанийн үүсгэн байгуулагч Рэнь Жэнфэй Төрийн өмчит "People’s Daily" сонинд ярилцлага өгөхдөө тус компанийн хөгжүүлсэн дан чип нь хүчин чадлаар АНУ-ын үйлдвэрлэгчдийн түвшинд хүрээгүй хэвээр байгаа ч “кластерт суурилсан тооцоолол ашиглаж энэ зөрүүг нөхөх боломжтой” хэмээж байв.

Компанийн хамгийн сүүлийн үеийн “Ascend” чип "Nvidia"-ийн шинэ чипүүдээс хүчин чадлаар дутуу тул дээрх технологи нь Huawei-ийн өрсөлдөх чадварыг дээшлүүлэхэд нэн чухал ач холбогдолтой. Ялангуяа АНУ-ын хоригоос шалтгаалж БНХАУ-ын компаниуд "Nvidia"-ийн хүчирхэг чипүүдийг ашиглах боломжгүй болсон энэ үед хиймэл оюуны бүтээгдэхүүн сургах, ажиллуулахад шаардлагатай хагас дамжуулагчийг дотоодынхоо технологиор хөгжүүлнэ гэсэн үг юм.

Сүүлд БНХАУ-ын эрх баригчид хиймэл оюунд ашиглах боломжтой "Nvidia"-ийн “RTX Pro 6000D” хагас дамжуулагчийг импортолж хэрэглэхгүй байхыг компаниуддаа сануулсан байна. Хиймэл оюуны салбарын стандартад тооцогддог "Nvidia"-ийн техник хангамжаас хамааралтай байдлаа бууруулж, дотоодоосоо орлох технологийн хөгжүүлэлтийг дэмжих Бээжингийн бодлогыг энэ алхам харуулжээ.

БНХАУ-ын компаниуд хиймэл оюуны технологи, чипийг эх орондоо хөгжүүлэхэд тогтвортой ахиц гаргаж буй мэдээллүүд нь сүүлийн хэдэн долоо хоногт тус улсын технологийн салбарын хувьцаанууд огцом өсөх түлхэц болж байна. Тухайлбал: "Alibaba" болон "Baidu" компани дотооддоо хөгжүүлсэн чипийн загвартаа чухал үйлчлүүлэгчид олсноо мэдээлж байсан бол БНХАУ-ын хиймэл оюуны чипийн нүүр царай гэгддэг "Cambricon Technologies"-ийн зах зээлийн үнэлгээ энэ онд цойлж буй.