АНУ-ын Калифорни муж өдгөө дэлхийд дөрөвдүгээрт бичигдэх том эдийн засагтай болсныг тус мужийн захирагч Гэвин Ньюсом зарлалаа. Мужийн дотоодын нийт бүтээгдэхүүн өнгөрсөн онд нэрлэсэн дүнгээр 4.1 их наяд ам.доллар хүрснээр 4.02 их наяд ам.долларын дотоодын нийт бүтээгдэхүүнтэй Япон улсыг ардаа орхиж байгааг тэрбээр Олон Улсын Валютын Сангийн шинэ тайланг эш татан мэдээлсэн байна.

Иймд хэрэв Калифорни муж тусгаар улс байсан бол дэлхийд зөвхөн АНУ, БНХАУ, ХБНГУ-ын дараа орох том эдийн засагтай улсад тооцогдоно гэсэн үг юм. Харьцуулбал Герман улсын эдийн засаг 2024 онд 4.3 их наяд ам.доллароор хэмжигджээ.

"Калифорни дэлхийтэй хөл нийлүүлж алхах бус дэлхийг түүчээлж байна. Бид иргэддээ хөрөнгө оруулалт хийж, тогтвортой хөгжлийг нэгдүгээрт тавьж, инновацын хүчид итгэдэг учраас манай эдийн засаг цэцэглэн хөгжиж байна" хэмээн Гэвин Ньюсом онцолжээ.

Калифорни муж АНУ-ын дотоодын нийт бүтээгдэхүүний 14 орчим хувийг бүрдүүлдэг бөгөөд үл хөдлөх хөрөнгө, санхүү, технологийн салбарт улсдаа гол хувь нэмэр оруулж буйг Калифорнийн Нийгмийн бодлогын хүрээлэн мэдээлжээ. Мөн өнгөрсөн онд мужийн хүн ам 250 мянга орчмоор өсөхөд төрөлт, цагаачлал нэмэгдсэн нь гол нөлөө үзүүлсэн байна.