Дотоодын зах зээлд нь нүүрсний үнэ хямд хэвээр байгаа нь импортын зарим төрлийн нүүрсний хэрэгцээг бууруулсан тул дөрөвдүгээр сард БНХАУ-ын нүүрсний импорт үргэлжлэн буурч магадгүй гэж тус улсын Нүүрсний тээвэрлэлт, түгээлтийн ассоциаци мэдээллээ.

Лхагва гарагт тус ассоциацийн хурал дээр яригдсан голлох мэдээллүүдээс харвал Индонез улс АМНАТ-өө нэмэхээр болсонтой холбоотойгоор тус улсын доогуур ангиллын эрчим хүчний нүүрс БНХАУ-ын дотоодын олборлолтын нүүрснээс өндөр үнэтэй болсон байна.

Мөн БНХАУ Өмнөд Африк, Колумбиас хол замаар тээвэрлэж авдаг нүүрсний импортоо багасгаж магадгүй. Түүнчлэн тарифаас болж зогссон АНУ-ын импортыг нөхөх үүднээс ОХУ, Монгол Улсаас авах нүүрсээ нэмэх боломжтой гэсэн байна. “Худалдааны дайн”-ы улмаас энэ онд БНХАУ-ын эрчим хүчний нүүрсний эрэлт 60 сая гаруй тонноор буурах тооцоолол гараад байгаа юм.

Сүүлийн статистик үзүүлэлтийг харвал БНХАУ-ын нүүрсний импорт гуравдугаар сард өмнөх оны мөн үеэс 0.9 хувиар буурсан бол дотоодын олборлолт нь 9.6 хувиар өсжээ.

Дашрамд дурдахад, Монгол Улс он гарсаар 2.1 сая тонн эрчим хүчний нүүрсийг Бичигт боомтоор дамжуулан БНХАУ-д экспортолсон нь өмнөх оноос 2.9 дахин өссөн үзүүлэлт болохыг Аж үйлдвэр, Эрдэс баялгийн сайд мэдээлж байсан юм.  2025 оны үлдсэн хугацаанд гурван сая тонн нүүрс нэмж экспортолж, 100 сая ам.долларын нэмэлт орлогыг олох боломж нээж байгааг онцолж байна.