Монголын говьд нүүрсний давхаргын метан хийн төсөл хэрэгжүүлж буй TMK Energy компани "Гурвантэс XXXV" төслийнхөө "Lucky Fox" талбайд туршилтын үйлдвэрлэлийн гурван цооног нэмж өрөмдөхөөр болсон байна.

Компани энэхүү өрөмдлөгийн ажлыг Торонтогийн биржид бүртгэлтэй Major Drilling Group компаниар гүйцэтгүүлэхээр гэрээ байгуулснаа мэдээлжээ.

Долоодугаар сард TMK Energy байгаль орчны менежментийн нэн чухал төлөвлөгөөгөө салбарын яамаар батлуулснаасаа хойш өрөмдлөгт шаардлагатай тоног төхөөрөмжүүдийг худалдан авч, талбайг бэлэн болгосноо мөн онцолсон байна.

Энэ удаагийн өрөмдлөгийн хөтөлбөрийг компани аравдугаар сарын эхээр эхлүүлэх хүлээлттэй бөгөөд мөн гэрээнд тусгагдсан өрөмдлөгийн ажлын өртөг нь өнгөрсөн онд өрөмдсөн гурван цооногоос 28 хувиар бага байгааг мэдээлжээ. Хөтөлбөрийн зорилт нь "Lucky Fox" талбайн нүүрсний дээд давхаргаас олборлох метан хийн хэмжээ эдийн засгийн үр ашигтай түвшинд хүрснийг баталгаажуулах явдал юм байна.