АНУ-ын Холбооны Нөөцийн банк бодлогын хүүгээ өндөр түвшинд илүү удаан хугацаанд хадгална гэсэн дохио өглөө. Энэ нь аж үйлдвэрийн түүхий эдүүдийн эрэлтийг бууруулж болзошгүй нөхцөл байдал үүсгэснээр зэс болон бусад металлуудын үнэ буураад байна.

Лондоны Металлын биржид зэсийн үнэ 1.2 хувиар буурч, тонн нь 9829 ам.доллар боллоо. Харин хөнгөн цагааны үнэ 1.7 хувиар,  цайр, цагаан тугалганы үнэ нэг гаруй хувиар буурчээ.

Хөрөнгө оруулалтын сангууд зэсийн арилжаанаас ашиг хүртэж, позицоо хаахтай зэрэгцэн дэлхийн хэмжээнд зэсийн нөөц тогтмол нэмэгдэж, БНХАУ-д эрэлт буурах төлөвтэй болсноор энэхүү металлын үнэ өнгөрсөн сард хүрсэн дээд түвшнээсээ 10 гаруй хувиар буурлаа.

Холбооны Нөөцийн банк мөнгөний хатуу бодлогоо үргэлжлүүлэх дохио зах зээлд өгсөн нь зэсийн үнийн уналтад нөлөөлсөн гэж “Shanghai East Asia Futures” компанийн шинжээч тодотгож байна.