БНХАУ-ын хэрэглэгчийн зарцуулалт дөрөвдүгээр сард 2.3 хувиар өссөн нь 2022 оноос хойших хамгийн сул өсөлт болсны сацуу орон сууцны үнийн уналт эрчимжжээ. Нөгөө талд экспорт өсөж, аж үйлдвэрийн салбарын нийт үйлдвэрлэл эрчимжсэн нь тус улсын сэргэлт жигд бус байгаагийн бас нэг нотолгоо болов.

Экспорт, үйлдвэрлэлийн өсөлт нь АНУ, Европтой үргэлжлүүлж буй худалдааны зөрчлийн улмаас богино настай байх эрсдэлтэй аж. Баасан гарагт Бээжингээс үл хөдлөх хөрөнгийн зах зээлээ дэмжих шинэ төлөвлөгөө зарлаж, зээлдэгчдэд тавигдах нөхцөлийг хөнгөвчилж, орон сууцны худалдан авалтад зарцуулах төсвийн хөрөнгө баталсан байна.

“Худалдааны сөргөлдөөн нь БНХАУ-ын энэхүү экспорт дагасан өсөлтийн тогтвортой байдалд асуудал учруулна. Эцсийн эцэст БНХАУ дотоодын эрэлтээ л өсгөх ёстой” хэмээн “Standard Chartered”-ийн Ахлах эдийн засагч Дин Шуан онцоллоо.