АНУ-ын прокурорууд дэлхийн хамгийн чинээлэг хүмүүсийн нэг, Энэтхэгийн тэрбумтан Гаутам Аданиг 250 сая гаруй ам.доллароор хэмжигдэх авлигын хэрэгт буруутай гэсэн дүгнэлт үйлджээ. Тодруулбал: Гаутам Адани болон бусад нэр холбогдогсод нарны эрчим хүчний төслийн гэрээ байгуулахын тулд Энэтхэгийн Засгийн газрын албан тушаалтнуудад авлига өгөхөөр амлаж, төсөлд санхүүжилт босгохоор хэлэлцээ хийж байсан АНУ-ын хөрөнгө оруулагчдаас дээрх төлөвлөгөөгөө нуун дарагдуулсан гэж үзсэн байна.

Түүнчлэн таван зүйл анги бүхий яллах дүгнэлтэд Гаутам Аданигийн зээ, сэргээгдэх эрчим хүчний компани удирддаг Сагар Адани, Внит Жаин нарыг АНУ-ын хууль зөрчсөн гэж буруутгажээ.

Боомтууд, нисэх буудлууд, эрчим хүчний шугам сүлжээ, авто зам гээд Энэтхэгийн эдийн засагт маш том нөлөөтэй төслүүдийг эзэмшдэг “Adani Group”-ийн хувьд энэ хэрэг нь ээлжит хямралын эхлэл болж магадгүй байна.

Үүнээс өмнө активист хөрөнгө оруулагч “Hindenburg Research" тус группийг луйврын хэрэгт буруутгаж, улмаар зах зээлийн үнэлгээ нь ихээхэн дүнгээр унаад байсан юм.