Газрын тосны экспортоор тэргүүлэгч “Saudi Aramco” компани 31 тэрбум ам.долларын ногдол ашиг хуваарилахаар боллоо. Эрчим хүчний үнэ болон үйлдвэрлэл буурсан ч Саудын Арабын төсвийн алдагдал тэлж буй энэ үед  “Saudi Aramco”-ийн дээрх шийдвэр дэмжлэг болох төлөвтэй байна.

IV улиралд тус компанийн гарц багассанаас шалтгаалан ашиг нь өнгөрсөн оны мөн үеэс 25 хувиар буурсан аж.

Тус компани энэ онд хөрөнгө оруулагчид болон Саудын Арабын Засгийн газарт ногдох ногдол ашиг нь 2023 оныхоос өндөр байлгахаар зорино гэж мэдэгдэж байсан юм.

Саудын Арабын Засгийн газар энэ онд “Saudi Aramco”-ийн хувьцааг дахин санал болгох төлөвлөгөөгөө сэргээж байгаа гэсэн мэдээлэл цацагдаад байгаа аж.

Тус компани ийнхүү ногдол ашиг хуваарилах замаар Саудын Арабын төсвийн үлэмж хэсгийг бүрдүүлж байгаа юм. Саудын Арабын удирдагчид эдийн засгаа төрөлжүүлэхийн зэрэгцээ өндөр өртөгтэй төслүүдэд анхаарч байгаа аж. Мөн спортын лигүүдэд хувь эзэмшин, од тоглогчидтой гэрээ байгуулж буй энэ үед “Saudi Aramco”-ийн ногдол ашиг улам бүр чухал болж байна.