Ирээдүйн эдийн засгийн бэлэн байдлын үзүүлэлтээр Монгол Улс 2023 онд 124 улсаас 75 дугаарт бичигдэж байгааг “Future Readiness Economic Index”-ээс харж болохоор байна.

Энэхүү индексийг Хүмүүн капитал, Технологи, Өрсөлдөх чадвар болон Биет капитал гэсэн дөрвөн үзүүлэлтээр үнэлжээ. Жагсаалтыг Сингапур, Дани, Швейцар зэрэг улс тэргүүлсэн байна.

Монгол Улсын хувьд Биет капиталын үзүүлэлтээр 100-аас 50 оноо, Хүмүүн капитал 43 оноо, Технологи 33 оноо, Өрсөлдөх чадвараар 31 оноо авсан байна.

2023 оны үнэлгээ нь улс орнуудын өгөгдлийн нууцлал, хиймэл оюун ухаан, үүлэн тооцоолол зэрэг асуудалд засаглалаа хэр сайн нийцүүлж, шинэчилж байгааг үнэлснээрээ онцлог болсон аж.

Ази, Номхон далайн бүс нутгийг авч үзвэл 2023 онд дээрх индексийн жигд бус бүс хэвээр байна. Тухайлбал: энэ бүс нутгаас Сингапур нэгдүгээрт, Мьянмар 110 дугаарт бичигдэж байгаа аж. Тухайлбал: бүс нутгийн 23 улсыг үнэлэхэд таван нь индексийн дээд түвшинд, дөрөв нь хоёрдугаарт, найм нь гуравдугаарт, зургаа нь доод түвшинд багтжээ.