БНХАУ-ын кокс үйлдвэрлэлийн гол бүсүүдэд агуулахын нөөц илүүдэлтэй байгаагаас тус улсын коксжих нүүрс олборлогчид үнээ улам эрчимтэй бууруулж байгааг “SXCoal” онцоллоо.

Гангийн үйлдвэрүүдэд коксын эрэлт багассанаас болж БНХАУ-ын кокс үйлдвэрлэгчид нүүрсний худалдан авалтаа багасгаж байгаа аж. Сүүлд наймдугаар сарын 14-нд ган үйлдвэрлэгчдээс гаргасан коксны үнийг тонн тутамд нь 50-55 юаниар бууруулах хүсэлтийг коксын үйлдвэрүүд хүлээн авсан байна.

Коксжих нүүрсний үнийн энэхүү уналт монголын экспортын нүүрсний дуудлага худалдаанд мөн нөлөөлж байгаа аж.

Монголын V ангиллын түүхий нүүрсний спот үнэ Ганцмод боомтод тонн нь 1200 орчим юань болж буураад байна. Наймдугаар сарын 14-нд “Energy Resources” компани 19 мянга 200 тонн угаасан коксжих нүүрсээ дуудлага худалдаагаар тонн нь 1150 юанийн эхлэх үнээр санал болгосон ч борлуулж чадаагүй юм.