Дотоодын нийт бүтээгдэхүүнээс эхлээд дундаж наслалт, авлигын түвшин, иргэдийн эрх чөлөөний мэдрэмж хүртэлх бүхий л үзүүлэлтийг шалгуур болгож эрэмбэлдэг “Дэлхийн аз жаргал”-ын судалгаанд Финланд улс долоо дахь жилдээ дараалан дэлхийн хамгийн аз жаргалтай орноор тодорсон байна.

НҮБ-ын Тогтвортой хөгжлийн шийдлийн сүлжээнээс жил бүр гаргадаг энэхүү судалгааны 2023 оны эрэмбэд Дани, Исланд улс 2, 3 дугаар байраа хадгалсан бол насны бүлгээр ангилсан эрэмбэд Литва улс хүүхдүүд болон 30-аас доош насныхан, Дани улс 60 болон түүнээс дээш насныхан хамгийн аз жаргалтай байдаг улсаар нэрлэгдлээ.

Харин Монгол Улс 2022 оны эрэмбэд 61 дүгээрт жагсаж байсан бол 2023 онд 77 дугаар байр руу ухарч, БНХАУ, ОХУ, Киргиз зэрэг улсын ард бичигджээ. Хэдийгээр Монгол Улс эдийн засгийн өсөлтөөр тэргүүлэгчдийн эгнээнд багтаж буй ч өсөлтийг хүртээмжтэй, тогтвортой байлгах талд сорилтууд их байгаагийн зэрэгцээ “Transparency International"-ийн судалгаагаар 2017 оноос хойш авлигын төсөөллийн индексээр тасралтгүй муудаж буй 10 улсын нэг болоод байгаа юм.