2024 оны эхний хагас жилд “БиДиСек ҮЦК” ХК 5.8 тэрбум төгрөгийн үйл ажиллагааны орлоготой ажилласан нь өмнөх оны мөн үеэс хоёр дахин өссөн үзүүлэлт болсныг Монголын Хөрөнгийн биржид тайлагнасан байна. Тайлант хугацаанд цэвэр ашиг нь 8.3 дахин өсөж, 3.8 тэрбум төгрөг хүрчээ.

2024 оны эхний хагас жилийн байдлаар тус компани брокерын үйл ажиллагааны хүрээнд гадаад, дотоодын нийт 33 мянга гаруй үнэт цаасны данс нээж, харилцагчийн бааз суурийг нэмэгдүүлснээ онцолж байна.

Тайлант хугацаанд Монголын Хөрөнгийн бирж дээр хийгдсэн нийт арилжааны 52.5 хувийг буюу 839.95 тэрбум төгрөгийн арилжааг дангаар гүйцэтгэжээ. Түүнчлэн биржийн бус зах зээлийн арилжааны хэмжээ, хөрөнгө оруулагчдын тоо тогтмол нэмэгдсээр байгааг тодотгож байна.

Энэ оны эхний хагас жилийн байдлаар биржийн бус зах зээлээр дамжуулан тус компани нийт 14.2 тэрбум төгрөгийн арилжааг гүйцэтгэсэн байна.

Андеррайтерийн үйл ажиллагааг нь аваад үзвэл “БиДиСек ҮЦК” ХК нь нийслэлээс гаргаж буй анхны бонд болох “Улаанбаатар бонд”-ын арилжаа болон “Сити ойл” ХХК, “Цогц зээл” ХХК-ийн хаалттай бондыг тус тус биржийн бус зах зээлд санал болгон арилжаалж, нийт 134.5 тэрбум төгрөгийг зах зээлээс татан төвлөрүүлээд байгаа аж.