“Microsoft”-ийн Гүйцэтгэх захирал асан Стив Балмер хөрөнгийн хэмжээгээрээ Билл Гэйтсийг анх удаа гүйцэж, дэлхийн зургаа дахь чинээлэг эрхэм боллоо. Даваа гарагт “Microsoft”-ийн хувьцааны ханш дээд түвшнээ дахин шинэчилснээр энэ он гарснаас хойших өсөлт нь 21 хувь хүрчээ.

157.2 тэрбум ам.доллароор хэмжигдэж буй Стив Балмерын нийт хөрөнгийн 90 хувь нь “Microsoft”-ийн хувьцаа хэлбэрээр байдаг аж.

Харин Билл Гэйтс 156.7 тэрбум ам.долларын хөрөнгөө нэлээн төрөлжүүлсэн бөгөөд 50 орчим хувийг нь “Microsoft”-ийн хувьцаа, ногдол ашгийн орлогын гүйлгээг хийх зорилгоор байгуулсан “Cascade Investment" компаниар дамжуулан эзэмшдэг байна. 

Мөн хаягдлын менежментийн “Republic Services” компанид 21 тэрбум ам.доллартой дүйцэх хэмжээний хувьцаа эзэмшиж байгаа ажээ.