АНУ-ын үйлдвэрлэгчийн үнийн индекс сайн үзүүлэлттэй гарсан нь ам.доллар болон АНУ-ын Засгийн газрын бондын өгөөжийг өсгөлөө. Энэ нь Японы иен болон  “Их 10”-ын бүлгийн бусад валютын ханшид сорилт болохоор байгаа юм.

Иений ам.доллартой харьцах ханш 0.2 хувиар суларч, өнгөрсөн долоо хоногт хүрээд байсан сүүлийн 34 жилийн хамгийн сул түвшинтэй ойролцоо буюу 151.65 нэгж хүрээд байна.

Японы Сангийн сайд Шуничи Сүзүки “Эрх баригчид иений ханшийн хөдөлгөөнийг анхааралтай хянаж байна. Аливаа огцом хөдөлгөөний эсрэг зохих арга хэмжээ авахад бэлэн” гэж мэдэгджээ.

“FX”-ийн захирал Брэд Бехтел “Хэрэв иений ханш аажмаар 152 нэгж хүрвэл Японы Засгийн газар хариу арга хэмжээ авна гэж бодохгүй байна. Харин 152-оос 154 эсвэл 155 нэгж рүү огцом суларвал хариу үйлдэл үзүүлж магадгүй" гэж үзэж байгаагаа илэрхийлжээ.