Фунт стерлингтэй харьцах иений ханш  сүүлийн 16 орчим жилийн доод түвшинд хүрч суларлаа. Ингэснээр Япон улсын Засгийн газар иений ханш үргэлжлэн сулрахаас сэргийлж зах зээлд хөндлөнгөөс оролцож магадгүй гэсэн болгоомжлолыг дахин сэргээж байна.

Иений ханш фунт стерлингийн эсрэг 0.1 хувиар буурч, 200.63 нэгжид хүрсэн нь 2008 оны наймдугаах сараас хойших хамгийн сул түвшин болж байгаа юм. Арилжаанд оролцогчид Их Британид бодлогын хүү “Их 10”-ын бүлгийн бусад орныхоос өндөр хэвээр байх болно гэсэн хүлээлттэй байгаа нь фунт стерлингийн ханш чангарахад нөлөөлжээ.

Английн Төв банк бусад томоохон Төв банктай харьцуулахад бодлогын хүүгээ арай хожуу бууруулах хандлагатай байгаа юм.

“Их 10”-ын бүлгийн орнуудын Төв банкнууд бодлогын хүүгээ одоогийн хүлээгдэж буй түвшнээс өндөр дүнгээр бууруулж, мөнгөний зөөлөн бодлого хэрэгжүүлсэн тохиолдолд л иений ханш чангарах боломжтой гэж “MonEx”-ийн гадаад валютын арилжаа хариуцсан шинжээч онцоллоо.

Үүнээс гадна оншор юанийн ханш өнгөрсөн оны 11 дүгээр сараас хойших доод түвшинд хүрч сулраад байна. БНХАУ-ын Төв банк юанийн албан ханшаа аажмаар бууруулснаар юанийн ам.доллартой харьцах ханш 7.2487 болж, сүүлийн дөрвөн сарын доод түвшинд хүрээд байгаа аж.  Зах зээлд Холбооны Нөөцийн банкны бодлогын хүүгээ бууруулах мөчлөг эхлэх болоогүй гэсэн хүлээлт үүссэнээр ам.долларын ханш юанийн эсрэг хоёр өдөр дараалан чангарсан юм.

БНХАУ-ын Төв банк зах зээлийг үймүүлэх, хөрөнгийн гадагшлах урсгалыг өдөөхгүйгээр эдийн засгийн өсөлтийг хангаж чадахаар түвшинд юанийн ханшийг хадгалахад сорилттой тулгарч байна.