Илон Маскийн хиймэл оюуны стартап “xAI” шинэчлэгдсэн “Grok-3” моделио танилцууллаа. Шинэ модель өмнөх хувилбараасаа 10 дахин илүү тооцооллын хүчин чадалтай, “Дэлхий дээрх хамгийн ухаалаг хиймэл оюун” болохыг Илон Маск танилцуулгын үеэр онцолсон байна. 

Математик, шинжлэх ухаан, кодчиллын жишиг үзүүлэлтүүдээр шалгахад “Grok-3” нь “Google”-ийн “Gemini”, “DeepSeek”-ийн “V3”, “OpenAI”-ийн “GPT-4o” моделиудыг хүчин чадлаараа давж байгааг тус компани тодотгожээ. 

Үүнээс гадна “xAI” компани “Grok-3”-ийн хамт “DeepSearch” ухаалаг хайлтын системээ танилцууллаа. “DeepSearch” нь хэрэглэгчийн оруулсан командыг хэрхэн ойлгосон, хариултыг яаж боловсруулсан үйл явцаа тайлбарладгаараа онцлог аж.

“Grok-3”-ийг одоогоор “X” платформын “Premium+” төлбөртэй үйлчилгээний хэрэглэгчид шууд ашиглах боломжтой юм байна.