Байгаль орчны активистууд болон загас агнуурын салбарынхны эсэргүүцлийг үл харгалзан Норвег улсын Парламент Хойд мөсөн далайн ёроолд ашигт малтмалын хайгуул хийх төлөвлөгөө баталжээ.

Хууль тогтоогчид Норвег, Гренландын хоорондох 280 мянган км.кв буюу Их Британийн нутаг дэвсгэрээс том талбайд хайгуул хийхийг зөвшөөрсөн байна.

Цахилгаан автомашины цэнэг хураагуур, нарны хавтан зэрэг бүтээгдэхүүний үйлдвэрлэлд нэн чухал ашигт малтмалуудын шинэ эх үүсвэрийн эрэлт өсөж буй нь сүүлийн жилүүдэд далайн ёроолын олборлолтод чиглэсэн дэлхий дахины анхаарлыг нэмэгдүүлсэн юм.

Норвегийн эх газрын хавтангийн нөөцийн судалгаанаас үзвэл тус бүсэд 45 сая тонн цайр, гурван сая тонн кобальт агуулагддаг байх магадлалтай аж.