Засгийн газрын урт хугацаатай бондын өгөөж 2012 оноос хойших дээд түвшинд хүрсэн нь томоохон асуудал үүсгэхгүй гэж үзэж буйгаа Японы Төв банкны Ерөнхийлөгч Казуо Уэда илэрхийллээ. 

Тэрбээр "Зарчмын хувьд урт хугацааны бондын өгөөжийг санхүүгийн зах зээл тодорхойлдог. Би зах зээлийн хөдөлгөөнийг анхааралтай хянасан хэвээр байх болно” гэж Италийн Стреса хотод болсон “Их-7” бүлгийн Сангийн сайд нар болон Төв банкны тэргүүн нарын уулзалтын үеэр хэлсэн байна.

Японы Төв банк бодлогын хүүгээ цаашид өсгөнө гэсэн таамаг хэвээр байгаа энэ үед тус улсын Засгийн газрын 10 жилийн хугацаатай бондын өгөөж сүүлийн 12 жилийн дээд түвшинд хүрлээ.

Казуэ Уэда Японы Сангийн сайд Шуничи Сүзүкитэй 15 минут орчим үргэлжилсэн хамтарсан хэвлэлийн бага хурлын үеэр зарим шинжээчдийн таамаглаж байсанчлан ирэх зургаадугаар сард болох уулзалтаар бодлогын хүү болон бондын худалдан авалтад өөрчлөлт оруулах боломжийн талаар тодорхой хэлээгүй байна.