“Монос хүнс” ХК-ийн “Компанийн засаглалын кодекс”-ийн хэрэгжилтийн үнэлгээ 2023 оны III улирлын байдлаар 96 хувь буюу “Хэвийн засаглалтай” ангилалд багтаж байна. Энэ оны дөрөвдүгээр сард хэрэгжилтийн үнэлгээ нь 76.4 хувь буюу “Дунд засаглалтай”, цаашид эрсдэл үүсэж, болзошгүй тул анхаарах хэрэгтэй гэсэн үр дүн гарч байсан юм.

Харин тус компани хагас жил орчмын хугацаанд ахиц гаргаж, засаглалын кодексоо хэвийн түвшинд хангасан байна.

“Монос хүнс” ХК-ийн Төлөөлөн Удирдах Зөвлөл компанийн комплайнсын хяналтыг ТУЗ-ийн дэргэдэх Аудитын хорооны удирдлага доор ажилладаг дотоод аудиторын үйл ажиллагаагаар дамжуулан хяналтаа тавин ажиллаж байна. Цаашид комплайнсын хяналтыг хэрэгжүүлэх зорилгоор комплайнсын ажилтан, нэгжийн орон тоог үүсгэж компанийн бүтэц орон тоонд өөрчлөлт оруулахаар хэлэлцүүлж ажиллах аж.

Үүнээс гадна жил бүрийн хувьцаа эзэмшигчдийн ээлжит хурлаараа ирэх оны ТУЗ-ийн төсвийг батлуулахдаа хуралд оролцсон хувьцаа эзэмшигчдэд ТУЗ-ийн гишүүдийн өнгөрсөн онд олгосон цалин урамшууллыг тайлагнаж, төсвийг хуралд оролцсон хувьцаа эзэмшигчдийн олонхын саналаар батлан шийдвэрлэж байгаагаа тодотгов.