БНХАУ, Барууны орнууд хоорондын худалдааны зөрчил өдөр ирэх тусам нэмэгдэж, “Их-7” өдгөө “хэт үйлдвэрлэл” гэх шинэ нэр томьёогоор Бээжинтэй хийх сөргөлдөөнөө зөвтгөх болжээ. Сүүлд Францын Сангийн сайд Бруно Ле Мер “Bloomberg”-т өгсөн ярилцлагадаа энэ талаар дэлгэрүүлж, “БНХАУ-ын хямд үнэтэй бүтээгдэхүүний хэтэрсэн экспорт бүх дэлхийн эдийн засгийг эрсдэлд оруулж байна” гэсэн юм.

Худалдааны хамгийн том түншүүдээ улам холдуулахгүйн тулд Бээжингийн зүгээс энэ мэтийн цохилтуудыг тэвчин өнгөрөөдөг байснаа өдгөө зогсоож, сүүлд л гэхэд том хөдөлгүүртэй автомашины импортод 25 хүртэлх хувийн тариф ногдуулахад бэлэн гэдгээ илэрхийлжээ. Мөн зарим хөгжингүй орнуудыг өөрийн талд оруулахад хүчин чармайлт гаргаж буй шинжтэй байна.

БНХАУ-ын Ерөнхий сайд Ли Цян Япон, БНСУ-ын удирдагчидтай хийсэн гурван талт уулзалтаараа нийлүүлэлтийн сүлжээний тогтвортой байдлыг хангахад Бээжинтэй хамтран ажиллахын давуу талыг ятган ойлгуулахыг хичээжээ. Хэдийгээр БНХАУ дээрх уулзалтаас санамж бичигтэй үлдэж чадсан ч Япон болон БНСУ-ын компаниуд хэрэглэгчдийн жагсаалтаа аль хэдийн төрөлжүүлж эхэлснийг статистик харуулж байна.