“PetroChina” компанийн цэвэр ашиг энэ оны эхний хагаст 88.6 тэрбум юань буюу түүхэн дээд түвшинд хүрч өссөнийг тайлагналаа. БНХАУ-д эрэлт сул байгаа ч газрын тосны үнэ өсөхтэй зэрэгцэн гарцаа нэмэгдүүлсэн нь өсөлтөд гол түлхэц болсон байна.

БНХАУ-ын газрын тос, байгалийн хийн томоохон олборлогч “PetroChina” тайлант хугацаанд 905.5 сая баррель газрын тос олборлосноо мэдээлжээ. Тус улсын Засгийн газар эрчим хүчний аюулгүй байдлын зорилтууддаа хүрэхийн тулд Төрийн өмчит газрын тосны томоохон компаниудаа олборлолтоо нэмэгдүүлэхэд ихээхэн хөрөнгө оруулалт хийхийг шаардаж байгаа аж.

Газрын тосны үнэ өссөн нь нь эдгээр компаниудад хөрөнгө оруулалтаа нөхөхөд тусалж байна. Оны эхний хагаст брент төрлийн газрын тосны үнэ баррель нь дунджаар 83 гаруй ам.доллар байсан нь 2023 оны мөн үед 80 орчим ам.доллар байснаас өндөр дүн болоод байгаа юм.