Ногоон технологийн үйлдвэрлэл дэх БНХАУ-ын тэргүүлэх байр суурийг АНУ болон Европ бууруулахыг эрмэлзэж буй нь дэлхийн уур амьсгалын өөрчлөлтийн эсрэг тэмцлийг удаашруулах эрсдэлтэй гэж БНХАУ-ын Ерөнхийлөгч Ши Жиньпиний Уур амьсгалын тусгай элч Лю Женмин мэдэгдлээ. Өнгөрсөн нэгдүгээр сард тус албан тушаалд томилогдсон тэрбээр энэ сард АНУ-д анхны биечилсэн уулзалтаа хийх гэж байна. 

Тэрбээр БНХАУ-аас бусад улсад ногоон технологийн үйлдвэрлэл дэлхийн эрчим хүчний шилжилтийн зардал 20 хувиар буюу зургаан их наяд ам.доллароор өснө гэсэн “Wood Mackenzie” компанийн судалгааг  онцолжээ.

Түүнчлэн БНХАУ-ын компаниуд эрчим хүчний тоног төхөөрөмж, цэнэг хураагуур, цахилгаан автомашиныг их хэмжээгээр үйлдвэрлэснээр үнэ нь хямдарч байгаа тул бусад улсад ч ашигтай тусна гэдгийг Лю Женмин тодотгосон байна.