"2024 онд бүс нутгийн зах зээлийн идэвхжил тэнцвэр сайтай байх ба голчлон БНЭУ-ын өсөлт, мөн БНСУ, Зүүн Өмнөд Азийн зах зээлийг чиглэсэн өндөр сонирхол үүнийг тодорхойлохоор байна" гэж “Goldman Sachs”-ийн Азийн хөрөнгийн зах зээл хариуцсан захирал Эдвард Бюн онцоллоо. 

Энэ онд Азид хамгийн өндөр хүлээлттэй байгаа IPO-нууд

Cainiao Smart Logistics Network

“Alibaba” группийн логистикийн нэгж болох “Cainiao Smart Logistics Network”-ийн хувьцааны арилжаа энэ онд хөрөнгө оруулагчдын ажиглалтад буй хамгийн өндөр түвшний IPO болохоор байна. Тус компани өнгөрсөн оны аравдугаар сард БНХАУ-ын зохицуулагчдаас зөвшөөрлөө авсан бөгөөд Хонгконгийн Хөрөнгийн биржид нэг тэрбум гаруй ам.доллар босгох хүлээлттэй байгаа юм. Мөн “Cainiao Smart Logistics Network” нь технологийн аварга “Alibaba”-ийн охин компаниудаас анхлан нээлттэй болж буй гэдгээрээ онцлог.

Ola Electric Mobility

Цахилгаан скутер үйлдвэрлэлээр Энэтхэгт тэргүүлдэг “Ola” стартап 661 сая ам.доллар татан төвлөрүүлж, цахилгаан автомашины зах зээлд тэлэх төлөвлөгөөндөө зарцуулахаар зорьж буй тул IPO нь хөрөнгө оруулагчид тэдэнд хэр их итгэл хүлээлгэж байгааг харуулах юм. Үүсгэн байгуулагч нь болох Бхавиш Аггарвал улсынхаа өмнөд хэсэгт цахилгаан автомашины дэлхийн хамгийн том зангилаа төвийг байгуулах алсын хараа өвөртөлжээ.

Waaree Energies

Нарны хавтан үйлдвэрлэгч, Мумбайд төвтэй "Waaree Energies" компани өнгөрсөн оны 12 дугаар сард 30 тэрбум рупитэй тэнцэх дүн бүхий хувьцаагаа санал болгох зөвшөөрөл аваад байна. Мөн тус компанийн одоогийн хувьцаа эзэмшигчид тус IPO-оор 3.2 сая гаруй ширхэг хувьцаагаа зарах аж.

Syngenta Group

2023 онд дэлхийн хамгийн өндөр дүнтэй IPO-нуудын нэгийг хийх байсан ч хойшлуулаад буй хөдөө аж ахуйн технологийн “Syngenta Group” энэ оны эцсээр Шанхайн Хөрөнгийн биржид гарах дахин нэг оролдлого хийж магадгүй байна. Хэдий тийм боловч 9.1 тэрбум ам.доллароор хэмжигдэх IPO нь урагш ахихад шаардлагатай зөвшөөрлүүдийг авч чадах эсэх нь тодорхой бус байгаа юм.

Tokyo Metro

Хоёр жилийн өмнө Японы Тээврийн яамнаас зөвшөөрлөө авсан метроны оператор компанийн IPO удахгүй биеллээ олох төлөвтэй. Хэдий тийм боловч хуулийн дагуу Японы Засгийн газар 2028 оны гуравдугаар сараас өмнө тус компанид эзэмшдэг хувьцаануудаа зарах шаардлагатай аж.