Австралийн Хөрөнгийн биржид бүртгэлтэй, Монголд нүүрсний давхаргын метан хийн “Гурвантэс XXXV” төсөл хэрэгжүүлж буй “TMK Energy” компани 2023 оны үйл ажиллагааны тайлангаа танилцууллаа. 

2023 оны дөрөвдүгээр сард өрөмдлөгийн ажил нь эхэлсэн Нарийн сухайтын туршилтын гурван цооногийн олборлолт оны турш тасралтгүй явагдаж, хийн урсгалын хэмжээ нь тогтмол нэмэгдсээр байсныг тайланд онцолжээ.

Харин тайлант жилийн эцсээр тус компани туршилтын цооногийн хөтөлбөрийнхөө гүйцэтгэлд хөндлөнгийн шинжээчдээр техникийн үнэлгээ хийлгэсэн байна. Үнэлгээгээр “Гурвантэс XXXV” төсөл нь техник шинж чанарын хувьд маш сайн, мөн туршилтын цооногийн хөтөлбөр сайн загварчлагдсан, менежмент үр дүнтэй гэж дүгнэгдсэнийг дурджээ.

Түүнчлэн өнгөрсөн оны эцэст  “TMK Energy” компани нэгж хувьцаагаа 0.004 ам.доллароор үнэлж, ойролцоогоор 2.5 сая ам.долларын санхүүжилт босгосон байна.

Өмнөговь аймгийн Гурвантэс суманд үйл ажиллагаа явуулж буй “TMK Energy” компани “Гурвантэс XXXV” төслийн үлдсэн 33 хувийг “Talon Energy” компаниас авснаар төслийг 100 хувь эзэмшиж эхлээд байгаа юм.