Австралийн Хөрөнгийн биржид бүртгэлтэй “Aspire Mining” компани Хөвсгөл аймаг дахь  өндөр чанартай коксжих нүүрсний "Овоот" төслийнхөө нөөц, баялгийн бүрэн хэмжээний судалгааны үр дүнгээ танилцууллаа. Тус ордын нийт нөөцийг 130 сая тонн, үүнээс баталгаат нөөц 76.8 сая тонн, таамаг нөөц 53.3 сая тонн гэж тооцоолсон байна.

Энэ нь “Овоот” төслийг дэлхийн зэрэглэлийн статус бүхий коксжих нүүрсний төсөл болохыг баталгаажуулж байгааг тус компани онцолсон юм. Уурхайн насжилтын хувьд нөөцийн үнэлгээ дээр суурилж тооцвол "олборлолт эхэлснээс хойш 31 жил" байна гэж үзжээ.

Мөн уурхайн хөрс хуулалтын хэмжээ дунджаас доогуур, анхан шатны хөрөнгийн зардал бага тул олборлолт эхэлснээс хойш гурван жилд хөрөнгө оруулалтаа нөхөхөөр байгааг тооцоолсон байна. Ингэснээр төслийн цэвэр үнэ цэн буюу үр ашиг 1.6 орчим тэрбум ам.доллароор хэмжигдэхээр байгаа аж.