БНХАУ-ын нүүрс олборлолтын томоохон компанийн нэг нефть-химийн үйлдвэрлэгчдийг түлшээр хангах нүсэр төслийн бүтээн байгуулалтыг эхлүүлэхээ зарлалаа. “China Energy Investment” компани Шинжаан Уйгурын Өөртөө Засах Орны Хами хотод 170 тэрбум юань буюу 24 тэрбум ам.долларын хөрөнгөөр нүүрснээс шингэрүүлсэн тос гарган авах үйлдвэр барихаар болсон байна.

Тус үйлдвэрийн эрчим хүчийг сэргээгдэх эх үүсвэрээс хангах бөгөөд төслийн эхний багц 2027 онд ашиглалтад орохоор байгааг онцоллоо. Хүчин чадлын хувьд хамгийн дэвшилтэт шингэрүүлэх технологийг ашиглаж, жилд дөрвөн сая тонн шингэн түлш боловсруулах боломжтой байх юм байна.

БНХАУ сүүлийн жилүүдэд нүүрс олборлолтын гол бүсүүд болох Шинжаан, Шаньси Муж, Өвөр Монголын Өөртөө Засах Оронд нүүрснээс шингэн түлш гарган авах үйлдвэрийн хэд хэдэн төслүүдийг батлаад байгаа аж.

Шинэ үйлдвэр баригдахаар болсон Хами хот нь Монгол Улстай хиллэдэг Хами аймгийн төв бөгөөд Говь-Алтай аймгаас 200 гаруй км-ийн зайд оршдог. Тус хотын захиргаа 2025 он хүртэл энэ төрлийн төслүүдэд 300 тэрбум юанийн хөрөнгө оруулалтын зөвшөөрөл олгож, 2030 он гэхэд 152 сая тонн нүүрс хэрэглэх тооцоотой байгаагаа онцолж байна.