Ураны эрэлт нэмэгдсэнээр АНУ болон холбоотон орнуудад хаагдсан ураны уурхайнуудын үйл ажиллагааг сэргээж эхэллээ. Тухайлбал: Вайоминг, Техас, Аризона, Юта зэрэг мужид АНУ-ын таван компани 2011 онд Японд болсон Фүкүшимагийн цөмийн дэлбэрэлтийн дараа хаагдсан уурхайгаа сэргээж байна.

Фүкүшимагийн ослын дараа ураны үнэ унаж, Герман, Япон зэрэг улс цөмийн реакторуудыг үе шаттайгаар зогсоох төлөвлөгөө санаачилсан юм.

Харин одоо Засгийн газрууд нүүрстөрөгчийн хийн ялгарлыг бууруулах зорилтоо биелүүлэхийн тулд цөмийн эрчим хүч ашиглаж, ураны эрэлт нэмэгдсэнээр үнэ нь өсөж эхэлсэн байна. Олон Улсын Атомын Эрчим Хүчний Агентлаг 2040 он гэхэд дэлхийд жил бүр 100 гаруй мянган метр тонн уран хэрэгтэй гэсэн тооцоо гаргаад байгаа юм. Одоогоор Канадын “Cameco” болон Казахстан улсын “Kazatomprom” компани дэлхийн нийт ураны нийлүүлэлтийн тал хувийг бүрдүүлж байна.

Канадын Торонто хотноо болж буй “PDAC 2024” чуулганы үеэр уран анхаарлын төвд байх төлөвтэй байгаа аж. “Denison Mines” зэрэг уран олборлогч 10 гаруй компани чуулганд оролцож байна.