Иений ханш ам.долларын эсрэг сүүлийн 34 жилийн хамгийн доод түвшиндээ хүрч суларснаар Япон улс үндэсний мөнгөн тэмдэгтийнхээ уналтыг сааруулах хүчин чармайлтаа эрчимжүүлнэ гэсэн хүлээлт нэмэгдэж байна.

Токиод иений ам.доллартой харьцах ханш 0.3 хувиар суларч, 151.97 болсноор 2022 оны 10 дугаар сард 151.95 хүрч байсан өмнөх доод түвшнээсээ давжээ.

Энэ долоо хоногт Япон улсын Сангийн дэд сайд Масато Канда гадаад валютын зах зээл дэх спекулятив арилжааны эсрэг шийдэмгий арга хэмжээ авахаа зарлаж, "Иений одоогийн уналт нь фундаментал хүчин зүйлсээс бус спекуляцаас үүдэлтэй нь тодорхой байна" хэмээн мэдэгдсэн юм.

Японы Төв банк саяхан дэлхийд цор ганц үлдээд байсан сөрөг утгатай бодлогын хүүгийн мөчлөгөө дуусгавар болгосон ч Япон ба бусад хөгжингүй орнуудын хоорондох бодлогын хүүгийн зөрүүтэй байдал удаан хугацаанд хадгалагдах хүлээлт хөрөнгө оруулагчдын дунд түгээмэл байгаа юм.