Дональд Трампын орооцолдсон залилангийн хэрэгтэй холбоотойгоор даваа гарагт түүний бизнесийн эзэнт гүрэн урьд байгаагүй том аюултай тулгараад байв. Гэтэл нөхцөл байдал эсрэгээрээ эргэж, АНУ-ын Ерөнхийлөгч асан түүний хөрөнгийн хэмжээ нэг өдөрт хамгийн их дүнгээр нэмэгдсэн байна.

Шүүхийн батлан даалтын барьцаа хөрөнгөд тэрбээр 500 сая гаруй ам.доллар төлөх ёстой болоод байсан ч эцсийн мөчид Нью-Йорк мужийн шүүх “аминд нь орж”, барьцаа хөрөнгийн хэмжээг 175 сая ам.доллар болгон бууруулжээ. Үүнтэй зэрэгцэн түүний сошиал сүлжээний компани болох “Trump Media & Technology Group”-ийн 29 сар үргэлжилсэн нэгдэн нийлэх хэлцлийн явц дуусгавар болсноор олон тэрбум ам.доллартой тэнцэх хувьцааг албан ёсоор Дональд Трампын мэдэлд шилжсэн байна.

Ингэснээр Дональд Трампын нийт хөрөнгийн хэмжээ дөрвөн тэрбум гаруй ам.доллароор өсөхөөр болжээ. Өөрөөр хэлбэл тэрбээр 6.4 тэрбум ам.долларын хөрөнгөтэйгөөр “Bloomberg Billionaires Index”-ээс гаргадаг дэлхийн хамгийн чинээлэг 500 хүний жагсаалтад анх удаа багтахаар болж байна.