Европын цахилгаан автомашины зах зээлийг өнгөрсөн сард анх удаа "BMW" тэргүүлж, “Tesla”-ийг ардаа орхилоо. Автомашин нийлүүлэгч “Jato Dynamics”-ийн мэдээлснээр "BMW" долоодугаар сард 14 мянга 869 ширхэг бүрэн цахилгаан автомашин борлуулсан нь 30 гаруй хувиар өссөн үзүүлэлт болсон байна. Харин энэ хугацаанд “Tesla”-ийн борлуулалт 16 хувиар буурч, 14 мянга 561 нэгж болжээ.

“Tesla” жилийн нийт борлуулалтын үзүүлэлтээрээ Европын цахилгаан автомашины зах зээлийг тэргүүлсэн хэвээр байгаа юм. Хэдий тийм боловч зах зээлд эзлэх байр сууриа "BMW", “Volvo” зэрэг компанид бага багаар алдаж эхэлснийг сүүлийн статистик харуулав.

Үүнээс гадна Европт цахилгаан автомашины эрэлт буурч эхэлсэн дүр зурагтай байна. Тус бүсийн хэрэглэгчид өнгөрсөн сард нийт 139 мянга 300 ширхэг шинэ цахилгаан автомашин худалдаж авсан нь өнгөрсөн оны мөн үетэй харьцуулахад зургаан хувиар буурчээ.