Дэлхий даяарх Гүйцэтгэх захирлуудын бараг тэн хагас нь “Өнөөгийн бизнес модель нь ирэх 10 жилд тэсэж үлдэхгүй” гэж үзэж байгааг "PwC" (PricewaterhouseCoopers) Давосын эдийн засгийн чуулганы үеэр танилцуулсан тайланд дурдлаа. Тайланд онцолсноор хиймэл оюун зэрэг технологийн дэвшлийн хурд, уур амьсгалын асуудал ихээхэн нөлөөлж байгаа аж.

"PwC"-ээс 4702 компанийн удирдлагын дунд явуулсан судалгаагаар 45 хувь нь “Бизнес нь ирэх 10 жилд тэсэж үлдэхгүй” гэж үзэж байгаа нь 2023 оны 39 хувийн үр дүнгээс өссөн үзүүлэлт болжээ.

Энэ талаар "PwC"-ийн удирдлага "Бизнесүүд цаашдын ашгийн өсөлтийн тухайд өөдрөг байх нь багасаж, бизнес загвараа сууриар нь шинэчлэх шаардлагатай байгааг хурцаар мэдэрч байна" гэж тайланг танилцуулахдаа тодотгосон байна.

Түүнчлэн бизнесүүд хиймэл оюун, уур амьсгалын асуудалд анхаарахын хэрээр макро эдийн засгийн сорилтуудад анхаарал бага хандуулж байгааг тайланд онцолжээ.