Турк улсын одоогийн Ерөнхийлөгч Режеп Тайип Эрдоан улиран сонгогдох нь тодорхой болсонтой зэрэгцээд лирагийн ханш ам.долларын эсрэг 29 хувиар сулрах эрсдэлтэй байгааг “Morgan Stanley”-ийн шинжээчид анхаарууллаа.

Бодлогын хүүг нам түвшинд барих Режеп Тайип Эрдоаны бодлого үргэлжлэхээр байгаа нь ханшийн уналтад голлон нөлөөлөхөөр байна.

2023 оны эцэс гэхэд лирагийн ам.доллартой харьцах ханш 28 болж, буурахаар байгаа бөгөөд таамаглаж байснаас харьцангуй богино хугацаанд унах төлөвтэй байгааг шинжээчид мэдээллээ.

Сүүлийн байдлаар лирагийн ам.доллартой харьцах ханш 19.97-д тогтсон нь доод түвшинд дөхсөн үзүүлэлт болж байна.

“Макро бодлогын нөлөөгөөр инфляцыг бууруулж, зах зээлд ээлтэй бодлого хэрэгжүүлэхгүй тохиолдолд тус улсын гадаад өр өндөр байгаа нь макро эрсдэлийг өндөр түвшинд хэвээр хадгалах төлөвтэй байна. Түүнчлэн түүхий эдийн үнийн өсөлт зэрэгт мэдрэмтгий байдлыг нэмэгдүүлнэ” гэж шинжээчид анхаарууллаа.