Эрчим хүчний хямрал нүүрлэж, нүүрсний хэрэглээгээ нэмэгдүүлээд буй ХБНГУ-ын Эдийн засгийн сайд Роберт Хабек 2030 он гэхэд нүүрсний хэрэглээг хална гэсэн зорилтдоо хүрэх найдлагатай байгаагаа “Bloomberg”-т өгсөн ярилцлагынхаа үеэр мэдэгдлээ.

Тус улсын Сангийн сайд Кристиан Линднер эрчим хүч олдоцтой, боломжийн үнэтэй болох нь тодорхой болтол "2030 он гэхэд нүүрснээс ангижрах мөрөөдлөө зогсоох ёстой" гэсэн байр суурь илэрхийлээд байгаа юм.

Герман улсын эрх баригч гурван нам хоёр жилийн өмнө эвслийн Засгийн газар байгуулахдаа 2030 он гэхэд чулуужсан түлшний хэрэглээнээс ангижрах зорилт тавьжээ. Хэдий тийм боловч өнгөрсөн онд Украины дайн эхэлсэнтэй холбоотойгоор үүссэн эрчим хүчний хямралд  ХБНГУ хамгийн ихээр өртөөд байгаа юм.

Энэ өвөл эрчим хүчний хангамжаа хангалттай хэмжээнд хүргэхийн тулд тус улс нүүрсний станцуудаа дахин эрчимжүүлээд байгаа аж.