2022 онд өрхийн сарын дундаж бодит нийт орлого өмнөх оны мөн үеэс 0.7 хувиар буурсныг Үндэсний статистикийн хороо мэдээллээ. Өнгөрсөн оны IV улиралд өрхийн сарын дундаж нийт орлого 1.8 сая төгрөг болсон бол бодит орлого 1.2 сая төгрөг болсон байна.
Өрхийн орлого, зарлагыг дундаж болон бодит үзүүлэлтээр хэмждэг. Дундаж орлого өссөн ч бодит орлого буюу инфляцын нөлөөллийг тооцсон орлого буурчээ.
Хэрэглээний үнийн индекс сүүлийн 14 сарын турш хоёр оронтой тоонд хадгалагдаж байна. Үнийн нөлөөллийг арилгаж тооцоолсон өрхийн орлого IV улиралд 1.2 сая төгрөг болсон нь өмнөх улирлаас 1.7 хувиар буурсан бол 2021 оны IV улиралтай харьцуулахад 0.7 хувиар буурчээ. Үүнд тэтгэвэр тэтгэмжийн бодит орлого 15.7 хувиар буурсан нь гол нөлөө үзүүлсэн байна. Мөн хөдөө аж ахуйн үйлдвэрлэлийн орлого 24.1 хувиар буурсан аж.
Өрхийн дундаж орлого IV улиралд 1.84 сая төгрөг болсон гэж ү Үндэсний статистикийн хороо мэдээлэв. Энэ нь өмнөх улирлаас 1.8 хувиар, өмнөх оны мөн үеэс 12.4 хувиар өссөн үзүүлэлт боллоо. Нийт орлогын дийлэнх хэсгийг мөнгөн орлого бүрдүүлж байгаа аж. Энэ дундаа тэтгэвэр тэтгэмжийн орлого мөн буурчээ.
Үүнээс гадна бусдаас үнэгүй авсан хүнсний болон хүнсний бус бүтээгдэхүүний үнийн дүн 10.3 хувиар өссөн болохыг Үндэсний статистикийн хороо мэдээллээ.
Нэг жилийн хугацаанд өрхийн орлогын бүлэглэлд гарсан өөрчлөлтөөс харахад 500-700 мянган төгрөгийн орлоготой өрхийн тоо өсөж 88.6 мянга хүрчээ.
Үнийн нөлөөллийг арилгаж тооцсон нийт зардал 1.2 сая төгрөг байсан нь өмнөх оны мөн үеэс 8.6 хувиар өссөн байна. Энэхүү өсөлтөд хүнсний бус бараа үйлчилгээний бодит зарлага нэмэгдсэнээр тайлбарлагдаж байгаа юм.
Харин хүнсний зардал өмнөх улирлаас 5.9 хувиар, бусдаас авсан хүнсний болон хүнсний бус бүтээгдэхүүний хэмжээ 16 хувиар буурсан байна.
Хүнсний бус бараа, үйлчилгээний зардлыг 11 бүлэгт хуваан авч үзэж байгаагаас сууцны үйлчилгээний зардал хоёр дахин, өрхийн цахилгааны зардал 4.5 дахин, тээврийн үйлчилгээний зардал 20 орчим хувиар өсжээ. Мөн бэлэн хувцасны зардал 21.7 хувиар өссөнийг Үндэсний статистикийн хороо мэдээллээ.