Чили улсын томоохон уурхайнуудын зэс олборлолтын зардал үргэлжлэн өссөөр байгааг тус улсын Зэсийн хороо буюу “Cochilco” тайландаа онцоллоо. Тодруулбал: шууд зардал паунд тутамдаа 198.8 цент болсон нь өмнөх оны мөн үеэс 39.6 центээр өссөн дүн болж байгаа аж.

Зардлын өсөлтөд олборлолт багассан, гуравдагч талын үйлчилгээний өртөг нэмэгдсэн, цалин урамшуулал, материалын үнэ өссөн зэрэг нь голлон нөлөөлжээ.

Дээрх судалгааг уул уурхайн олборлолтын 22 компанид хийсэн байна. Эдгээр компани тус улсын зэсийн нийт олборлолтын 93.5 хувийг бүрдүүлдэг аж. Түүнчлэн судалгаанд хамрагдаагүй  19 компанид ч зардал нь өссөн дүнтэй гарсан байна.

Тухайлбал: Канадын уул уурхайн “Teck Resources” компанийн Чили дэх хамгийн том зэсийн уурхайн төслийн зардал дахин нэмэгдсэнийг мэдээллээ. Энэхүү мэдэгдлийн дараа тус компанийн хувьцааны ханш 9.1 хувиар унаж, 2022 оны зургаадугаар сараас хойш байгаагүй өндөр дүнгээр буюу сүүлийн долоон сарын доод түвшинд хүрч буурчээ. Тус компанийн “Quebrada Blanca 2” төслийн зардал 8-8.2 тэрбум ам.доллар байна гэж тооцоолж байсан бол 8.6-8.8 тэрбум ам.доллар болж нэмэгдэхээр байгааг мэдэгдсэн байна.

“Teck Resources” компанийн бүтээн байгуулалтын ажил хойшлогдож байгаа нь зэсийн нийлүүлэлтийг нэмэгдүүлэхэд сорилт болж байгааг дурджээ.