Дэлхийн таваарын зах зээл илүү өндөр өртөгтэй болж, бохирдуулалт нь ч нэмэгдэх төлөвтэй байна. Дайн, цар тахлаас үүдэлтэй түүхий эдийн хомсдол нь олон арван жилийн дээд түвшиндээ хүрээд буй таваарын үнийн өсөлтийг эрчийг улам нэмэхээр байгааг зургаадугаар сард явуулсан “MLIV Pulse” судалгаанд дурджээ. Үүнтэй зэрэгцэн Европ тив ОХУ-ын эрчим хүчний бүтээгдэхүүнээс татгалзсанаар шатах түлшний эрэлт өсөх нь тодорхой болсон тул таваарын үнийн өсөлт цэвэр эрчим хүчний шилжилтийг түргэсгэнэ гэсэн итгэл найдвар үгүй болж байна.

Украинд дайн дэгдсэнээр үр тарианы экспорт хумигдаж, газрын тосны гол үйлдвэрлэгч орнуудын нэг ОХУ-тай дэлхийн дийлэнх орнууд эдийн засгийн харилцаагаа тасалсан нь үнийн дарамт огцом нэмэгдэхэд түлхэц болоод байгаа юм. Улмаар энэ нь цар тахлаас хойш хадгалагдсаар байсан нийлүүлэлтийн саатал, хомсдолын асуудлыг улам хурцатгаснаар таваарын зах зээлийг хянадаг “Bloomberg Commodity Index” энэ онд 35 хувиар буюу 1979 оноос хойших хамгийн өндөр эрчээр өсөхөд нөлөөлжээ.

Хэдийгээр өндөр түвшинд хадгалагдаж байсан боловсруулаагүй газрын тосны үнэ буурсан ч үр тарианы үнэ үргэлжлүүлэн өссөнөөр дэлхийн хүнсний нөхцөл байдлыг улам муутгана гэж “MLIV Pulse” судалгаанд онцолсон байна. Үүний зэрэгцээ Европт энэ өвөл ОХУ-ын байгалийн хийн хоосон орон зайг нөхөх нэгдүгээр сонголт нь сэргээгдэх эрчим хүч бус нүүрс байх төлөвтэй байгаа аж. Судалгаанд оролцогсдын 68 хувь нь нүүрсийг голлох түлш болно гэж хариулсан бол  32 хувь нь сэргээгдэх эрчим хүчийг сонгожээ.