Илон Маск “Twitter” компанийн Гүйцэтгэх захирлын албан тушаалаа шилжүүлж, өөрөө Технологи хариуцсан захирал болохоо зарлалаа. Үүний дараа “NBCUniversal”-ийн захирал Линда Яккарино "Twitter"-ийн Гүйцэтгэх захирлын албан тушаалыг авахаар хэлэлцэж байгаа гэж “Wall Street Journal” мэдээлсэн байна.

Илон Маск өөрийн “Twitter” хуудсандаа шинэ Гүйцэтгэх захирал зургаан долоо хоног орчмын хугацаанд ажлаа эхэлнэ гэж мэдэгджээ.

Илон Маск анх өнгөрсөн оны аравдугаар сард “Twitter”-ийг 44 тэрбум ам.доллароор авахдаа Гүйцэтгэх захирлын албан тушаалд зохион байгуулалтын өөрчлөлт хийх хүртлээ байна гэдгээ мэдэгдэж байсан юм. Түүнчлэн хэт их ажилтай байгаагаас “Twitter”-ийн Сан Франциско дахь төв оффист хонож байгаагаа онцолж байв.