Их Британийн Хөрөнгийн биржид бүртгэлтэй “Petro Matad” компанийн үйл ажиллагаа 2023 онд эргэн сэргэхээр байна гэж Англид төвтэй “Progressive Equity Research” байгууллага үзлээ.

Хилийн хязгаарлалттай холбоотойгоор БНХАУ-аас шаардлагатай үйлчилгээ авч чадалгүй, үйл ажиллагаа нь саатаж байсан бол одоо хязгаарлалт сулраад байгаа юм. Түүнчлэн V блокийн “Velociraptor” талбайд хийх өрөмдлөгийг гүйцэтгэх зургаан сая ам.долларын санхүүжилт босгоод байна. Энэхүү санхүүжилтийг Монголд шинэ лиценз авах, сэргээгдэх эрчим хүчний бизнес эхлүүлэх зэрэгт зарцуулахаар байгаа аж.

Мөн XX блокт “Heron-1” талбайн илрүүлэг гүйцэтгэж, олборлож эхлэхэд бэлэн болж байгааг тодотгосон байна. Шаардлагатай баг болон тоног, төхөөрөмжийг авчрахаар бэлтгэжээ.

“Petro Matad” компани “Wolfson” хамтарсан компани байгуулж Монголд сэргээгдэх эрчим хүчний салбарт үйл ажиллагаа эхлүүлэхээр төлөвлөж байгаа юм. Энэ чиглэлд түншүүд нь хэд хэдэн боломжит төсөл олж тогтоосон байна.

Монгол Улсад Төрөөс энэ салбарт дэмжлэг үзүүлэхээр төлөвлөж байгаа нь “Petro Matad”-д дэмжлэг болно гэж “Progressive Equity Research” байгууллага үзжээ.