Монгол Улсын Засгийн газар “Rio Tinto” компаниас Монгол дахь зэс, алтны “Оюу Толгой” төслийн өргөтгөлийн ажлын төсөв болох долоон тэрбум ам.долларыг дахин нэмэгдүүлэхгүй байхыг хүссэн талаар Уул уурхай, Хүнд үйлдвэрийн сайд Ж.Ганбаатар “Reuters” агентлагт мэдээлсэн байна.

“Оюу Толгой” төслийн өргөтгөлийн ажлын төсөв анх 2016 онд 5.3 тэрбум ам.доллар байсан бол нэмэгдсэнээр санхүүжилтийн асуудал дагуулж байгаа юм. Төсөв хэтэрсэнтэй холбоотой талуудын маргаан удаан үргэлжилж, 2022 онд “Rio Tinto” Монгол Улсын Засгийн газрын 2.4 тэрбум ам.долларын өрийг цайруулснаар маргаан намжиж байв.

Түүнчлэн гүний уурхайн анхны үйлдвэрлэлийг 2023 оны дунд үед эхлэхээр төлөвлөсөн гэж Уул уурхай, Хүнд үйлдвэрийн сайд Ж.Ганбаатар онцолжээ. “Rio Tinto” компанийн 2022 оны эцсийн тайланд дурдсанаар 2023 оны эхний улиралд багтан гүний уурхайн үйл ажиллагаа тогтвортой үйлдвэрлэлд хүрэх төлөвлөгөөтэй байна.

БНХАУ эдийн засгаа эргэн нээхтэй зэрэгцээд “Rio Tinto” компанийн хувьцааны ханш эрчимтэй өсөж байгаа юм.

Сүүлийн хаалтаар 127.6 австрали доллар болж, сүүлийн 52 долоо хоногийн буюу өнгөрсөн оны гуравдугаар сарын долооноос хойших дээд түвшинд хүрсэн байна. Харин арилжааны идэвх нь сүүлийн 20 хоногийн дунджаас 77 хувиар өндөр байгаа юм.