Монгол Улсын хөгжлийн түншүүд сэргээгдэх эрчим хүчний салбарт хамтран ажиллах саналтай байгаагаа илэрхийллээ.

“2030 оноос нүүрсний хэрэглээ багасах хандлагатай. Тиймээс нар, салхины цахилгаан станц зэрэг сэргээгдэх эрчим хүчний төсөлд Монгол Улстай хамтарч ажиллах боломжтой”-г ХБНГУ-ын Элчин сайд Хэльмут Кулитц онцоллоо. БНФУ-ын Элчин сайд Себистиан Сүрүн, НҮБ-ын хөгжлийн хөтөлбөр, Азийн Хөгжлийн банкны суурин төлөөлөгч нар санал нэгтэй байгаагаа илэрхийлсэн байна.

Монгол Улс эрчим хүчний хэрэглээнийхээ 20 хувийг импортоор хангадаг. Иймд импортын хараат байдлыг бууруулахад анхаарч  хөрөнгө оруулалт, сэргээгдэх эрчим хүчний шинэ эх үүсвэрийг хөгжүүлэх, эрчим хүчний үр ашгийг дээшлүүлэх шаардлагатай гэж Даян дэлхийн ногоон хөгжлийн институтийн (GGGI) тайланд дурджээ.

Монгол Улсын Засгийн газар ногоон хөгжил, сэргээгдэх эрчим хүчийг хөгжүүлэх талаар бодлогын тодорхой амлалтуудыг өгсөн юм. Энэ хүрээнд “Тогтвортой хөгжлийн бодлого 2030”, “Алсын хараа 2050” бодлогын бичиг баримтуудыг батлаад байна.

Мөн Монгол Улс нийт эрчим хүчний системийн суурилагдсан хүчин чадалд нар, салхи, усны сэргээгдэх эрчим хүч үйлдвэрлэх суурилагдсан хүчин чадлын эзлэх хувийг 2023 он гэхэд одоогийн 18.1 хувиас 20 хувь хүртэл, 2030 он гэхэд 30 хувь хүртэл нэмэгдүүлэх зорилт дэвшүүлэн ажиллаж байгаа юм.