Торонтогийн хөрөнгийн биржид бүртгэлтэй "Silver Elephant" компани 2.5 сая нэгж эрхийг тус бүр нь 0.3 ам.долларын үнэтэй гаргаж, 750 мянган ам.доллар хүртэлх хөрөнгө босгохоор зорьж байна. 

Нэгж эрх бүрд нэг хувьцаа, нэг хувьцааны хагасыг авах эрх багтжээ. Хувьцаа авах эрхийн хувьд хоёр жилийн хугацаанд нэг нэгж хувьцааг 0.45 ам.доллароор тооцож авах эрх байгаа аж. Мөн энэ хөрөнгө оруулалтаар авах үнэт цаасыг хөрөнгө оруулагч дөрвөн сар нэг хоногийн хугацаанд хадгалах үүрэг хүлээж байна.

Уг хөрөнгө босгох ажиллагаа 2023 оны долоодугаар сарын 20-ны өдөр дуусгавар болно. Нийт санхүүжилтийг Боливи улсад хийх хайгуул, Монголын Улаан-Овоо төслийн үйл ажиллагааг дахин эхлэх зэрэгт зарцуулна гэдгийг мэдэгдэлдээ дурджээ. 

Дашрамд дурдахад, компанийн Гүйцэтгэх захирал Жон Лий 90 мянган ам.долларын үнэ бүхий 300,000 нэгж эрх авч байгаа аж.

“Silver Elephant” компанийн гол төсөл нь Боливи дахь мөнгөний төсөл юм. Түүнчлэн Монгол Улсад “Улаан овоо” нүүрсний уурхайг охин компани "Mega Thermal Coal"-оор дамжуулан эзэмшдэг.