2022 оны эхний 11 сард төмөр замын тээврийн салбарын орлого 7.8 хувиар буурсан бол агаарын тээврийн салбарын орлого 2.7 дахин нэмэгдсэн байна.

Агаарын тээврийн салбарын орлого 446.4 тэрбум төгрөг болж өсөхөд тээсэн ачаа 2.3 дахин, зорчигч урсгал 9.2 дахин өссөн нь гол жин даржээ.

Статистик мэдээллээр энэ оны I-XI сард агаарын тээврээр давхардсан тоогоор 850.7 мянган хүн зорчсон байна.

Хэдий тийм боловч 2022 онд COVID-19 болон ОХУ Украины дайны нөхцөл байдлын улмаас Монгол Улсын нутаг дэвсгэр дээгүүр хийгддэг нислэг 130 мянгаас 60 мянга болтлоо буурснаар навигацын орлого 80 тэрбум төгрөг болж буураад байгааг ИНЕГ-ын дарга С.Мөнхнасан мэдээлж байв.

2022 онд Улаанбаатар-Берлиний чиглэлийг бүрэн зогсоосон бол ОХУ Украины дайнтай холбоотойгоор ОХУ-ын чиглэлийн нислэгийг түр хугацаанд зогсоогоод байгаа юм. Улаанбаатар-Истанбул чиглэлийн хувьд энэ оны хоёрдугаар сараас суудал дүүргэлт 80 хувьтай болсон тул алдагдалгүй байгааг МИАТ ТӨХК-ийн Гүйцэтгэх захирал Б.Мөнхтамир мэдээлж байлаа.

Харин төмөр замын тээврийн салбарын орлого 670.2 тэрбум төгрөг болж буурахад ачаа тээврийн хэмжээ 15.2 хувиар буурсан нь гол нөлөө үзүүлсэн бол зорчигч тээврийн урсгал 9.2 дахин өсжээ. Тухайлбал: энэ оны I-XI сард төмөр замаар давхардсан тоогоор 2.26 сая хүн зорчсон нь сүүлийн гурван жилийн хугацааны хамгийн өндөр дүн болж байна.

Тээвэрлэсэн ачааны хэмжээ 24.8 сая тонн болж өмнөх оны мөн үеэс 15.2 хувиар буурчээ. Хэдийгээр уул уурхайн бүтээгдэхүүний экспортын хэмжээ энэ онд эрс өссөн ч төмөр замын ачаа эргэлт буурсан байна.