Есдүгээр сарын 15-наас буюу энэ баасан гарагаас эхлэн төмрийн хүдэр, баяжмалыг Монголын Хөрөнгийн бирж дээрх дуудлага худалдааны системээр арилжиж эхэлж байна.

“Монголросцветмет ТӨҮГ” болон "Дарханы төмөрлөгийн үйлдвэр" ХК-ийн нийт 78.8 мянган тонн төмрийн баяжмалыг гурван удаагийн арилжаагаар арилжих товтой байгаа аж. Дуудах доод үнийн хувьд 58 хувийн агууламжтай баяжмал 56 ам.доллар, 65 хувийн агууламжтай төмрийн баяжмал 90-93 ам.доллар байна.

Үүний дараа мөнгө, зэсийг биржээр арилжихаар бэлтгэж байгааг Засгийн газар мэдэгдэж байсан юм. Биржээр арилжаалсан ашигт малтмалыг хилээр тусгай гарцаар гаргадаг болох ажээ.

УИХ-аас Уул уурхайн бүтээгдэхүүний биржийн тухай хууль баталж, зургаадугаар сараас хүчин төгөлдөр мөрдөж эхэлсэн юм.  “Монголын хөрөнгийн бирж” ХК-ийн ТУЗ-ийн тогтоолоор “Төмрийн хүдэр, баяжмалын арилжааны гэрээний стандартыг тогтоох, мөрдүүлэх журам”-ыг баталсан бөгөөд "Монголросцветмет" ТӨҮГ, "Дарханы төмөрлөгийн үйлдвэр" ХК худалдагчаар бүртгүүлж, гэрээ байгуулаад байна.