Хоёр долоо хоног орчмын хугацаанд саатаад байсан ОХУ-ын түлшний нийлүүлэлт эргэн сэргэсэн ч дотоодын зах зээлд шатахууны хангамж тогтворжиж чадахгүй байгааг Ашигт малтмал, газрын тосны газар (АМГТГ) мэдээллээ.

ОХУ-ын дотоодын зах зээлийн нөхцөл байдалтай холбоотойгоор 2023 оны есдүгээр сарын 22-ны өдрөөс тодорхойгүй хугацаагаар шатахууны экспортоо хориглох шийдвэр гаргасан юм. Харин аравдугаар сарын зургааны өдрөөс эхлэн ОХУ-аас Монгол Улсад Сүхбаатар боомтоор нийлүүлэлтээ сэргээсэн ч нийлүүлэлт, эрэлтийн зөрүүнээс шалтгаалан хомсдол үүсээд байна.

Одоогоор Цагааннуур, Боршоо боомтоор авто замаар шатахуун нийлүүлэхгүй байгаа аж. Монгол Улсын хувьд дотоодын шатахууны хэрэглээнийхээ 95 орчим хувийг ОХУ-аас дээрх хоёр боомт болон Сүхбаатар, Эрээнцав боомтоор төмөр замаар хангадаг.

ОХУ-аас есдүгээр болон аравдугаар сарын захиалгыг бүрэн биелүүлэх хүрээнд шатахууны ачилт, тээвэрлэлтийн хэмжээг аравдугаар сарын дунд үеэс нэмэгдүүлсэн юм. Аравдугаар сарын 31-ний өдрийн байдлаар 511 вагон хил, өртөө, боомтод зогсож байгаа бөгөөд шуурхай нэвтрүүлэхээр ажиллаж байгааг байгааг Ашигт малтмал, газрын тосны газар мэдэгдлээ.