Долоо хоног үргэлжилсэн Бүх Хятадын Ардын Төлөөлөгчдийн Их Хурал хаалтаа хийлээ. Энэ удаагийн хурлаар Ши Жиньпин гурав дахь удаагаа Ерөнхийлөгчөөр сонгогдсоноос гадна томоохон албан тушаалтнуудын халаа сэлгээ хийсэн нь онцлог байв.

Аюулгүй байдал бол хөгжлийн суурь, харин тогтвортой байдал бол хөгжлийн урьтал болохыг БНХАУ-ын Ерөнхийлөгч  Ши Жиньпин Бүх Хятадын Ардын Төлөөлөгчдийн Их Хурлыг хааж хэлсэн үгэндээ онцолсон юм. Тэрбээр ерөнхийдөө эдийн засгийн бие даасан тогтвортой өсөлтийг хангаж, БНХАУ-ын Коммунист намын манлайллыг бэхжүүлэх амлалт өглөө. Түүнчлэн Тайванийн асуудалд гуравдагч тал оролцохыг шийдэмгий эсэргүүцэж, энхийн арга замаар хоёр талын харилцааг гүнзгийрүүлэхийг тодотгосон нь анхаарал татаж байна.

Төрийн зөвлөлийн бүрэлдэхүүний хувьд халаа сэлгээ харьцангуй цөөхөн хийгдсэн нь тооцоолоогүй шийдвэр болсон юм. Тухайлбал: 26 гишүүний бараг хагас нь хуучин гишүүд хэвээр үлджээ. Тэдний дунд БНХАУ-ын Ардын Төв банкны тэргүүн И Ган, Сангийн сайд Лиу Кун нар багтсан нь эдийн засгийн тогтвортой байдлыг хангах Ши Жиньпиний зорилтыг бататгаж байна.

Үүнээс гадна БНХАУ-ын Төрийн зөвлөлийн Ерөнхий сайд Ли Көцианы халааг Ши Жиньпиний ойрын холбоотон гэгддэг Ли Цян авлаа.

Шинээр сонгогдсон Ерөнхий сайд хувийн хэвшлийн бизнесийг чиглэсэн дэмжлэгийг үргэлжлүүлж, энтрепренерүүдийн эрхийг хамгаалан ажиллах болохоо олон нийтэд хандсан анхны мэдэгдэлдээ онцолсон юм.