Наймдугаар сарын эцсийн байдлаар зээлийн өрийн үлдэгдэл өмнөх сараас 1.8 хувиар өсөж, 25.8 их наяд төгрөг хүрлээ. 2023 оны эхээр зээлийн өсөлт саарч байсан бол наймдугаар сард эргэн дээшилж, 13.4 хувь хүрчээ. 

Монголбанкны Ерөнхийлөгчийн мэдээлснээр зээлийн чанаргүйдэл аажмаар сайжирч, нийт дүнд эзлэх хувь буурч байгаа юм.

Наймдугаар сарын байдлаар хэвийн зээлийн үлдэгдэл өмнөх сараас хоёр хувиар нэмэгдсэн бол анхаарал хандуулах зээлийн үлдэгдэл 2.4 хувиар өсжээ. Харин чанаргүй зээлийн үлдэгдэл өмнөх сараас 0.2 хувиар, 2022 оны мөн үеэс 11.7 хувиар буурсан байна.

Харин Монголын Банкны холбоо "Иргэдэд олгосон зээлийн хэмжээ нэмэгдэж, бизнесийн зээл олголт сэргэж байгаа"-г онцолж байв. Мөн иргэд цалин, тэтгэвэр болон хадгаламж барьцаалсан зээл түлхүү авсан нь нийт банкны салбарын зээлийн өсөлт хэвийн үргэлжлэхэд нөлөөлж буй аж.

2023 онд хүнсний хувьсгал болон бусад төсөл хөтөлбөрүүд хэрэгжиж буй ч хөнгөлөлттэй хүүтэй зээлийг банкнууд өөрийн шалгуураар олгож байна. Бусад салбарын хувьд уул уурхай, худалдааны салбарын зээл олголт өмнөх жилүүдээс буурч, үйлчилгээ, барилгын салбарынх өсжээ.

Наймдугаар сарын эцсийн статистик мэдээллээр мөнгөний нийлүүлэлт өмнөх сараас 1.9 хувиар, өмнөх оны мөн үеэс 21.1 хувиар өссөн үзүүлэлттэй гарлаа. Цаашид төсвийн тодотголын хүрээнд мөнгөний нийлүүлэлт өсөх эрсдэл хадгалагдаж байгааг эдийн засагчид онцолж байсан юм.